【信報】「獨孤求敗」塔雷伯

上回講到，「獨孤求敗」塔雷伯 （N. N Taleb）87股災「贏到開巷」，心生恐懼，竟打道回府瞓覺定神。究竟當日發生何事？

原來道指單日狂插22%，未算最勁，Eurodollar波幅更強。塔氏事前買入「終極價外」認購期權（價外達20個標準差），Eurodollar裂口高開370點子，大量基金被挾爆倉（包括「海龜派」掌門丹尼斯R. Dennis），終極價外，變成深入價內！

理論上（Gaussian Distribution）離平均值（mean）「僅」7個標準差外的事件，應該每776000000000日才會發生一次，是典型的「黑天鵝事件」（這個街知巷聞的術語，便出自塔氏手筆，意指「經驗讓人誤信不可能發生的事件」），20個標準差事件，更是不可思議。以恒指類比，以執筆時恒指的波幅及收市價 21708點計算，價外20個標準差的認購期權，要立刻變成價外的話，指數要裂口升到27062點！睇市幾叻，也不可能估到吧？

就在丹尼斯壯烈挾死之際，「獨孤求敗」手持的Eurodollar認購期權，暴升了67000倍。定過神後，檢查倉位，本能反應，不是開香檳慶祝，而係check吓架報價機，究竟係咪壞咗。何解？損益表中的零太多，怕壞機空歡喜。

除了Eurodollar，組合中的德國馬克期權，同樣由終極價外變價內，倉位剎時地球咁大，搞成個禮拜才能完全平倉。

1998 年起，塔雷伯創立Empirica Capital，招式依舊，放棄睇市，靠「守株待（黑天）鵝」制勝。以其打法，十年總有幾次怒勝，其餘時間，小賺小蝕，但絕無「揩大鑊」之虞。何解？買入 期權，輸有限（最多盡輸期權金），只忌風平浪靜「耦死」，只要注碼控制得宜，豈能大敗。

2000年，基金大賺六成。之後四年，兩負兩勝，無關痛癢。此時，塔雷伯自遇黑天鵝，身患怪疾，唯有退隱。副手Spitznagel另起爐灶，邀塔氏為顧問。新店2007年以3億美元啟航，現已碌到60億，靠的又是黑天鵝。

話說雷曼爆煲前夕，標普在1200上落，佢哋就買850認沽期權，只係0.9一張。五個禮拜之後，標普跌咗300點，加上引伸波幅跳升，個put變咗60。 仲未計用散紙買的AIG認沽期權，爆升到21美元。當年滿街鮮血，恒指30日跌1000點，在「獨孤求敗」指導下，Spitznagel的基金反賺三位數 字回報。有銀士自跪求加入，當買保險。或曰：「唓！淨係識買價外期權之嘛，雕蟲小技！」查實人有盲點，喜攻厭守，就像細路仔踢波，人人淨識圍住個波「進 攻」。但反觀地上最強球隊，攻時水銀瀉地，被圍時同樣銅牆鐵壁，有入（球）無失（球），攻守兼備，才能長贏長有。世之常態，牛市、股皇、泡沫，每役必與， 戰史可講足十日十夜，但身家永無寸進，豈會無因？唯靠知識改變命運。

「百無一用是書生？」．之四

(原載於信報財經DNA)